عفوا يا سيادة الرئيس...لدي سؤال بريء جدا...اذا كنت تقول بأنه ما في مفاوضات وما في سلام وعملية السلام انهارت..
على اي اساس يتم اعتقال المجاهدين في الضفة الغربية وعلى اي اساس يتم استدعاء اصحاب الرأي السياسي!
بدك تحكيلي هيك بتطلب الاتفاقيات؟
...بس يا سيدي انتا بتحكي انه ما في اتفاقيات معهم وما في مفاوضات.
بدك تحكيلي انهم خارجين عن القانون؟
سيدي اي قانون واحنا لسا ما عنا دولة ؟ ممكن اعرف مين اللي حط هالقانون؟
برضو ممكن تحكيلي انهم خارجين عن الاجماع الوطني؟
بس على علمي يا سيدي انه لحد اليوم ما في اجماع وطني على شيء وحتى المصالحة اللي حكيتو انها حصلت ما شفناش منها حاجة.
اه يمكن انك تحكيلي هادول بيعملو مقاومة غير سلمية!
سيدي عفوا شو قصدك بالمقاومة السلمية؟ قصدك انه نروح ونرقص على دوارات رام الله لحد ما تيجينا الدولة ؟ ولا يا سيدي قصدك انه نحمل لافتات نكتب عليها بدنا دولة ونرفعها بوجه المستوطن اللي عمره 15 سنة و ما بيقرأ عربي اصلا وهو حامل رشاش بإيده بده يقتلنا!
اذا انتا بتفكر يا سيدي انه هاي المقاومة ممكن تنفع مع اليهود انا يا سيدي بعذرك بتعرف ليش ؟ لاني متأكد انه انتا عمرك في حياتك ما طلعت في مسيرة ولا عمرك في حياتك شميت ريحة قنابل الغاز ولا عمرك في حياتك مشيت في مظاهرة.
ما تآخذني سيادة الرئيس على طولة لساني بس والله لاني اليوم شفت كتير ناس مخدوعين بالخطاب اللي كنت تحكيه في الامم المتحدة وكانو يفكرو انك صلاح الدين بس لابس بدلة.
سيدي معلش تحملني بدي اسئلك آخر سؤال. الدولة تبعتك اللي بدك تعمللنا اياها على حدود 67 بتخلي اللاجئ يرجع لأرضه وبيته في تل الربيع وام خالد وام الرشراش ؟
...شايفك سكتت يا سيدي ما جاوبت..آآآآه انا آسف حقك علي لانه انا حكيتلك اسماء انتا ما بتعرفها.. انا يا سيدي قصدي بتل الربيع تل ابيب وام خالد نتانيا يا سيدي وام الرشراش بتكون ايلات. اكيد عرفتهم هسا صح ؟
وانا متأكد يا سيدي انه جوابك رح يكون لأ لانك بتعرف انه اللي بيترجى عدوه يعطيه دولة بيكون سهل عليه ينسى بلده.
اخيرا بتمنى منك يا سيادة الرئيس انك ما تضحك على شعبنا وتلعب بعواطفه. شعبنا بيتطلع للحرية وللوطن وللدولة بس للوطن الحر مش المحتل اللي بيقوم على قوة حقيقية مش على معونات خارجية ومش على استجداء من الغرب. الدولة يا سيدي تنتزع ولا توهب
